Dagur 1 - 13. Júlí
Áfangastaðir: Riga, Lettland | Belgrad, Serbía

Ferðin hefst á flugi með íslenska fararstjóranum okkar frá Keflavík kl. 00:45 til Riga í Lettlandi þar sem við lendum kl. 07:20 á staðartíma. Frá flugvellinum förum við upp á hótel nærri flugvellinum áður en við fljúgum áleiðis til Belgrad í Serbíu klukkan 11:55, áætlaður þar komutími klukkan 13:05.

Innlendi fararstjórinn okkar tekur á móti okkur þar og fer með okkur á hótelið okkar, Zepter Hotel Belgrade. Eftir að við höfum skráð okkur inn á hótelið gefst frjáls tími þar til við förum í stutta gönguferð þar sem við munum meðal annars sjá Knez Mihajlova stræti og Kalemegdan virkið - sem hefur verið hertekið 77 sinnum frá því það var reist.

Við snæðum saman kvöldverð á þjóðlegum veitingastað nærri miðbænum áður en við endum daginn á hótelinu okkar.

Dagur 2 - 14. Júlí
Áfangastaðir: Belgrad, Serbía | Fruska Gora National Park, Serbía | Novi Sad, Serbía

Að loknum morgunverði förum við í skoðunarferð. Við byrjum á Belgrad þar sem við komum til með að kynnast borginni betur, heimsækjum Fruska Gora þjóðgarðinn og Krusedol munkaklaustrið og bæinn Sremski Karlovci sem hefur verið sannkölluð menningar- og sögumiðstöð Serba síðastliðin 200 árin.

Sremski Karlovci er afar fallegur bær sem einkennist af barokk-arkitektúr, þar munum við sjá Biskupssetur bæjarins, Four Lions Fountain gosbrunninn, St. Nicholas Orthodox Church kirkjuna og framhaldsskóla bæjarins sem er sá elsti sinnar tegundar í Serbíu. Endum heimsókn okkar hér með hunangs- og vínsmökkun.

Næst keyrum við áleiðs til Petrovaradin Fortress virkisins sem jafnan er talað um sem “Gíbraltar Dóná árinnar” sökum hernaðarlegs mikilvægis þess og staðsetningar. Við endum daginn í borginni Novi Sad þar sem við förum gangandi í skoðunarferð um miðbæinn og heimsækjum/sjáum ráðhús borgarinnar, dómkirkjuna, Assembly of Vojvodina sem er heimkynni löggjafavalds borgarinnar og síðan svæði sem mætti kalla verslunarhverfi borgarinnar. Í lok skoðunarferðarinnar gefst einhver frjáls tími til að ganga um og kynnast borginni betur, setjast niður á kaffihúsi og njóta þess sem er á boðstólum þar eða hvað annað sem okkur hugnast.

Við keyrum aftur til Belgrad í lok dags þar sem við munum snæða saman kvöldverð og gistum áfram á Zepter Hotel Belgrade.

Dagur 3 - 15. Júlí
Áfangastaðir: Belgrad, Serbía | Bajina Bašta, Serbía

Byrjum daginn á morgunverði á hótelinu og skráum okkur síðan út af því. Frjáls tími þar til seinnipart dags, við hittumst þá aftur og förum saman í heimsókn til The Church of Saint Sava kirkjuna sem er eitt þekktasta kennileiti Belgrad borgar, tileinkuð Sava sem varð fyrsti serbneski erkibiskup þjóðkirkjunnar sem og verndardýrlingur þjóðarinnar.

Að lokinni heimsókninni keyrum við vestur til bæjarins Bajina Bašta þar sem við borðum saman kvöldverð og gistum á Zepter Hotel Drina.

Dagur 4 - 16. Júlí
Áfangastaðir: Bajina Bašta, Serbía | Tara National Park, Serbía

Eftir að hafa borðað morgunverð á hótelinu leggjum við af stað í hálfsdagsferð þar sem við heimsækjum Tara National Park þjóðgarðinn og dalinn sem áin Drina rennur um. Sökum þess hversu afskekktur þjóðgarðurinn er og veðurskilyrða þar hafa varðveist steingervingar af öllum toga og litt þekkt tegund grenitrjáa, Picea Omorika - sem eru serbnesk grenitré. Kalksteinn er allra algengasta gerðin af steini í garðinum.

Í þessari skoðunarferð verður keyrt í rútu um þetta afskaplega fallega svæði, farið í um eins kílómetra langa gönguferð um skóginn, stöldum við útsýnispall þar sem við okkur blasir vægast sagt einstakt útsýni, fáum leiðsögn og fræðslu um Zaovine stöðuvatnið og heimsækjum síðan bæði Rača Monastery munkaklaustrið sem var byggt í kringum ~1276-1282 og Cyrillic Museum safnið í Rača sem er tileinkað kýrillíska stafrófinu.

Frjáls tími seinnipartinn þar til við heimsækjum BB Klekovača sem er elsta eimingarhús Serbíu, þekktast fyrir framleiðslu á klekovača rakija sem er ákveðin gerð af koníaki, unnið úr plómum og einiberjum.

Dagurinn endar aftur í Bajina Bašta þar sem við borðum saman kvöldverð og gistum áfram á Zepter Hotel Drina.

Dagur 5 - 17. Júlí
Áfangastaðir: Perućac National Park, Serbía | Višegrad, Bosnía og Hersegóvina | Sarajevo, Bosnía og Hersegóvina

Morgunverður á hóteli áður en farið er af stað í skoðunarferð um Perućac National Park þjóðgarðinn, að lokinni heimsókn þangað tekur við um ~3 klukkustunda sigling um Drina ána og samnefnt gljúfur. Hvorutveggja er þekkt fyrir einstaka náttúrufegurð.

Næst heimsækjum við bæinn Višegrad en þekktasta kennileiti bæjarins er Mehmed Paša Sokolović brúin frá 16. öld. Brúin var í aðalhlutverki í ritverki Ivo Andrić, The Bridge on the Drina. Einnig munum við heimsækja bæinn Andrićgrad sem hefur haldið útliti sínu sérlega vel frá fyrri öldum og er nánast eins og gestir ferðist aftur í tíma á göngu sinni um bæinn sem við munum einmitt gera áður en við endum daginn á sameiginlegum kvöldverði.

Við gistum á Hotel Europa í Sarajevo.

Dagur 6 - 18. Júlí
Áfangastaðir: Sarajevo, Bosnía og Hersegóvina

Morgunverður á hóteli. Dagurinn hefst á skoðunarferð um Sarajevo þar sem við kynnum okkur sögu hennar og óhefðbundinn byggingarstíl, hér má meðal annars finna íslamskan miðaldararkitektúr sem og austurrískan. Borgin spilaði stórt hlutverk í sögu 20. aldar í Evrópu þegar erkihertoginn Franz Ferdinand var myrtur hér árið 1914. Í þessari skoðunarferð heimsækjum við einnig Tunnel of Hope sem er stríðsminjasafn þar sem hlutverk Sarajevo í Bosníustríðinu er til sýnis.

Frjáls tími að skoðunarferð lokinni þar til við borðum saman kvöldverð. Við gistum áfram á Hotel Europa í Sarajevo.

Dagur 7 - 19. Júlí
Áfangastaðir: Mostar, Bosnía og Hersegóvina | Blagaj, Bosnía og Hersegóvina | Trebinje, Bosnía og Hersegóvina

Morgunverður á hóteli áður en við leggjum af stað til borgarinnar Mostar sem er í um ~130 kílómetra fjarlægð frá Sarajevo. Í Mostar förum við fótgangandi í skoðunarferð um borgina og kynnum okkur sögu hennar, hluta hennar sem er á Heimsminjaskrá UNESCO og njótum þess sem borgin hefur upp á að bjóða. Hún er þekkt fyrir hrífandi arkitektúr, ríka sögu, framandi matargerð, góð vín, sól og fallega náttúru auk þess sem hún er talin ein af rómantískustu borgum heimsins.

Næsti áfangastaður okkar er þorpið Blagaj sem er þekktast fyrir hús sem sem hafa verið höggvin úr og í bergið þar. Blagaj Tekkesi er musteri sem hefur tilheyrt iðkendum Dervish, hóps sem má segja að heyri undir Súfisma, frá árinu 1520. Í dag geta gestir fræðst um þetta trúarbragð sem einkennist af dulspeki-áhrifum og nægjusemi iðkenda þess, hvernig það virkar og sögu þess.

Við endum daginn í borginni Trebinje þar sem við snæðum saman kvöldverð og gistum á Hotel Platani þar.

Dagur 8 - 20. Júlí
Áfangastaðir: Mostar, Bosnía og Hersegóvina | Tvrdoš Monastery, Bosnía og Hersegóvina

Hefjum daginn á morgunverði áður en við förum í akandi skoðunarferð um borgina. Að henni lokinni setjum við stefnuna á Tvrdoš klaustrið frá 15. öld sem er þekktast fyrir að framleiða vín úr Žilavka og Vranac þrúgunum sem vaxa á svæðinu og okkur býðst að prufa í vínsmökkun.

Við endum daginn aftur í Trebinje þar sem við snæðum saman kvöldverð og gistum áfram á Hotel Platani.

Dagur 9 - 21. Júlí
Áfangastaðir: Dubrovnik, Króatía | Split, Króatía

Að loknum morgunverði leggjum við af stað til borgarinnar Dubrovnik í Króatíu þar sem við förum saman í skoðunarferð um borgina, kynnum okkur þann hluta sem er á Heimsminjaskrá UNESCO og fáum síðan frjálsan tíma þar til við förum aftur af stað og endum daginn í borginni Split.

Við borðum saman kvöldverð í Split og gistum á Hotel Amphora.

Dagur 10 - 22. Júlí
Áfangastaðir: Split, Króatía

Morgunverður á hótelinu og síðan þriggja klukkustunda löng skoðunarferð um Split þar sem við sjáum það allra helsta, gamla borgarhlutann, Diocletian's Palace höllina, Golden Gate borgarhliðið, Gregory of Nin styttuna auk vinsælasta markaðstorgs borgarinnar. Frjáls tími í Split að lokinni skoðunarferðinni.

Við borðum saman kvöldverð í lok dags og gistum áfram á Hotel Amphora.

Dagur 11 - 23. Júlí
Áfangastaðir: Split, Króatía

Morgunverður á hóteli og síðan frjáls dagur í Split til að njóta þess sem borgin hefur upp á að bjóða eða slaka á, hvað sem hentar hverjum og einum.

Sameiginlegur kvöldverður í lok dags og gist áfram á Hotel Amphora.

Dagur 12 - 24. Júlí
Áfangastaðir: Riga, Lettland | Keflavík, Ísland

Heimfarardagur. Við byrjum á snemmbúnum morgunverði eða tökum með okkur nestispakka upp á flugvöllinn í Split, við eigum flug þaðan til Riga í Lettlandi klukkan 09:45 og áætluð lending þar klukkan 13:20 á staðartíma.

Fararstjóri mun taka hópinn með sér í skoðunarferð um borgina og síðan gefst frjáls tími þar til hópurinn verður sóttur og keyrður á flugvöllinn í Riga. Áætlaður brottfarartími heimflugsins er klukkan 23:00 og lendum við heima á Íslandi klukkan 23:55 á staðartíma.