Dagur 1 - 15. Maí

Áfangastaðir | Riga, Lettland

Ferðin hefst á flugi með íslenska fararstjóranum okkar frá Keflavík klukkan 08:50 til Riga í Lettlandi þar sem við lendum klukkan 15:25 á staðartíma. Við verðum sótt á flugvöllinn og keyrð upp á Tallink Hotel Riga, frjáls dagur eftir það.

Dagur 2 - 16. Maí
Áfangastaðir | Tirana, Albanía | Durrës, Albanía

Dagurinn hefst á flugi frá Riga klukkan 11:35 og lendum við í borginni Tirana klukkan 13:15. Eftir að við höfum sótt farangur okkar keyrum við til borgarinnar Durrës, einnar elstu og mikilvægustu borgar í sögu Albaníu. Við gistum á Bel Conti Hotel eða sambærilegu hóteli.

Dagur 3 - 17. Maí
Áfangastaðir | Shkodër, Albanía | Durrës, Albanía

Við byrjum daginn á morgunverði á hótelinu okkar og förum síðan af stað í átt að mikilægasta bæ norðurhluta Albaníu, Shkodër, sem á sér rúmlega 2,200 ára langa skráða sögu. Við komum til með að heimsækja Rozafa kastalans og njóta hins stórfenglega útsýnis þar og einnig Marubi National Museum of Photography þar sem við skoðum einstakt safn af ljósmyndum frá daglegu lífi heimamanna frá fyrri hluta 19. aldar til loka hennar. Við förum í gönguferð um hina nýlega endurbyggðu göngugötu bæjarins og virðum fyrir okkur arkitektúr frá Ítalíu og Austurríki sem er vitnisburður um tengsl þeirra landa við Albaníu áður fyrr.

Við endum daginn á því að keyra aftur til Durrës þar sem við gistum á Bel Conti Hotel eða sambærilegu hóteli.

Dagur 4 - 18. Maí
Áfangastaðir | Apollonia, Albanía | Vlorë, Albanía

Við byrjum daginn á morgunverði á hótelinu okkar og förum síðan af stað í átt að Ardenica klaustri sem var reist á miðöldum. Í kirkjunni er að finna helgimyndir eftir albanska listamenn eins og Athanas Zografi og Kostandin Shpataraku. Þjóðsagan segir að þjóðhetja Albaníu, Gjergj Kastrioti eða Skanderbeg, hafi gift sig í kirkjunni árið 1451. Eftir heimsókn okkar í klaustrið stendur gestum til boða að njóta hefðbundins hádegisverðar að hætti heimamanna [valkvætt].

Okkar næsti áfangastaður er hin forna borg Apollonia sem var upphaflega stofnuð af Grikkjum sem komu frá Corinth í Grikklandi um 600 árum fyrir Krist. Hún var þegar orðin stórborg á tímum Grikkja með um 50 þúsund íbúa og síðar meir undir stjórn Rómarveldis varð hún enn mikilvægari sökum nálægðar hennar við helstu vegi stórveldisins. Rómverski keisarinn Augustus Octavius stundaði nám í borginni um tíma.

Við endum daginn á því að keyra til borgarinnar Vlorë þar sem við gistum á Hotel Vlora International eða sambærilegu hóteli.

Dagur 5 - 19. Maí
Áfangastaðir | Vlorë, Albanía

Við byrjum daginn á morgunverði á hótelinu okkar og heimsækjum síðan Sjálfsstæðissafn landsins. Þessi bygging sem í dag hýsir safnið var einnig heimili fyrstu ríkisstjórnar sjálfstæðrar Albaníu. Eftir heimsókn okkar á safnið höldum við til Radhimë strandarinnar skammt frá Vlorë og eigum afslappaðan dag þar.

Við endum daginn á því að keyra aftur til borgarinnar Vlorë þar sem við gistum áfram á Hotel Vlora International eða sambærilegu hóteli.

Dagur 6 - 20. Maí
Áfangastaðir | Sarandë, Albanía

Við byrjum daginn á morgunverði á hótelinu okkar og ferðumst síðan meðfram sjónum til borgarinnar Sarandë og á leið okkar þangað ökum við eftir tilkomumikilli fjallaleið í yfir 1,000 metra hæð yfir sjávarmáli. Við munum sjá Llogara skarð á leiðinni og njótum fallegs útsýnis sem blasir við okkur þaðan. Við borðum saman hádegisverð í Sarandë.
Eftir hádegið munum við njóta góðrar stundar á Ksamil ströndinni sem er talin ein af þeim fallegri í Albaníu. Við borðum saman kvöldmat á veitingastað sem býður upp á hefðbundinn og þjóðlegan mat áður en við endum daginn á Brilant Hotel eða sambærilegu hóteli.

Dagur 7 - 21. Maí
Áfangastaðir | Butrint, Albanía | Sarandë, Albanía

Við byrjum daginn á morgunverði á hótelinu okkar áður en við förum til hinnar fornu borgar, Butrint, sem er á heimsminjaskrá UNESCO. Þessi dagur verður hálfgert ferðalag til fortíðar og Butrint hápunktur hans. Á tímum forn-Grikkja var borgin grísk nýlenda en yfir aldirnar girntust hana hin ýmsu ríki, þar á meðal Rómverjar eins og rannsóknir fornleifafræðinga á svæðinu hafa leitt í ljós. Borgin var staðsett úti á nesi, umlukin framandi og litríkri náttúru.

Að loknum miðdegisverði er frjáls tími og gefst tækifæri til að njóta sín á Ksamil ströndinni. Við gistum áfram á Brilant Hotel eða sambærilegu hóteli.

Dagur 8 - 22. Maí
Áfangastaðir | Finiq, Albanía | Gjirokastër, Albanía

Við byrjum daginn á morgunverði á hótelinu okkar. Við setjum stefnuna á borgina Finiq, sem var höfuðborg ættbálks forn-Grikkja sem bjó á svæðinu. Okkar næsti áfangastaður er Gjirokastër, falleg borg sem er á heimsminjaskrá UNESCO og þekkt fyrir sérstakar byggingar. Í raun er borgin eitt stórt safn af virkilega vel varðveittum, fögrum og sérstökum byggingum í arkitektúr Tyrkjaveldis eða Ottóman-veldisins. Yfir borginni stendur kastalavirki sem við munum heimsækja og þar finnum við vel útbúið vopnasafn, meðal annars vopn frá fyrri heimsstyrjöldinni. Þessi kastali geymir ekki einungis vopnasafnið því fimmta hvert ár er haldið landsmót tileinkað þjóðlagatónlist og dansi.

Við endum daginn á því að heimsækja náttúrufyrirbærið Bláa Augað eða “The Blue Eye”. Þetta vatnsból er þekktast fyrir hið óvenju hreina og gegnsæa vatn sem kemur upp þar.

Um kvöldið borðum við saman kvöldverð í Gjirokastër og gistum á Hotel Kodra eða sambærilegu hóteli.

Dagur 9 - 23. Maí
Áfangastaðir | Berat, Albanía

Við byrjum daginn á morgunverði á hótelinu okkar áður en við keyrum til einnar fegurstu borgar Albaníu, Berat. Borgin er ein fjölmargra perla sem Ottóman-veldið skildi eftir sig og áhrif Ottóman-veldisins má sjá víða, meðal annars í því hversu margar moskur eru í borginni. Borgin hefur oft verið kölluð "The Town of a Thousand Windows" eða Þúsund-glugga Borgin, kemur nafnið til vegna hinna hvítkölkuðu húsa með glugga sem virðast nánast hafa verið byggðir hver ofan á annan. Hér sjáum við mjög spennandi samsuðu hinna ýmsu menningarheima í einni og sömu borginni.

Við munum einnig heimsækja kastala borgarinnar sem gnæfir yfir henni. Kastalinn er ansi merkilegur fyrir margt en kannski einna helst vegna þess að íbúar þar búa enn í sömu húsum og forfeður þeirra gerðu áður fyrr. Innan virkisveggja kastalans voru margar kirkjur og sjö þeirra standa enn, þar af hefur einni þeirra verið breytt í safn sem hýsir verk eftir listamanninn Onufri sem var uppi á 16. öld. Hann skapaði fjöldan allan af veggmyndum og líkneskja sem má finna í kirkjum víðsvegar bæði í Albaníu og Grikklandi. 

Að skoðunarferð lokið förum við saman á vel valinn veitingastað þar sem við brögðum á þekktustu og bestu réttum borgarinnar og gleðjum bragðlaukana. Við gistum á Mangalemi Hotel eða sambærilegu hóteli.

Dagur 10 - 24. Maí
Áfangastaðir | Krujë, Albanía | Tirana, Albanía

Við byrjum daginn á morgunverði á hótelinu okkar. Áfangastaður okkar þennan daginn er Krujë, fallegur smábær sem situr á hæð. Þessi bær á sér merka sögu og var í aðalhlutverki þegar Albanir stóðu í vegi fyrir að Ottóman-veldið næði að herja á vesturhluta Evrópu. Þjóðhetjan Skanderbeg leiddi Albani í þessum hernaði og var fyrir vikið útnefndur sérstakur verndari Kristinnar trúar af þáverandi páfa.

Við munum heimsækja Krujë kastalann og Skanderbeg safnið þar, eitt frægasta safn landsins. Í hádeginu borðum við saman albanska rétti og eigum notalega stund. 

Við endum daginn í borginni Tirana þar sem við gistum á Capital Tirana Hotel eða sambærilegu hóteli.

Dagur 11 - 25. Maí
Áfangastaðir | Tirana, Albanía

Við byrjum daginn á morgunverði á hótelinu okkar áður en við förum í skoðunarferð um borgina. Við sjáum meðal annars opinberar byggingar, litríkar íbúðarblokkir, Et'hem Bey moskuna, Klukkuturninn svokallaða sem er eitt þekktasta kennileitið í miðbæ borgarinnar og Þjóðminjasafnið þar sem við kynnum okkur sögu lands og þjóðar. 

Eftir skoðunarferðina setjum við stefnuna á Dajti þjóðgarðinn þar sem við borðum saman hádegisverð og njótum hins ótrúlega útsýnis sem býðst þar. Að því loknu förum við saman í gönguferð um Blloku-hverfið þar sem leiðtogar Kommúnistaflokksins höfðu áður aðsetur. Eftir að við höfum fengið smá hvíldartíma á hótelinu okkar býðst þeim sem það vilja að vera keyrð aðra leiðina í verslunarmiðstöð í nágrenninu.

Við gistum áfram á Capital Tirana Hotel eða sambærilegu hóteli.

Dagur 12 - 26. Maí
Áfangastaðir | Riga, Lettland

Flugið okkar frá Tirana til Riga er klukkan 14:00 og lendum við í Riga klukkan 17:40 að staðartíma. Við gistum aftur á Tallink Hotel Riga.

Dagur 13 - 27. Maí
Áfangastaðir | Keflavík, Ísland

Flugið okkar frá Riga er klukkan 10:45 og við lendum heima á Íslandi klukkan 11:45 að staðartíma.