Dagur 1 | 11. Júní

Áfangastaðir | Riga, Lettland

Ferðin hefst á flugi með íslenska fararstjóranum okkar frá Keflavík klukkan 00:45 til Riga í Lettlandi þar sem við lendum klukkan 07:20 á staðartíma. Við verðum sótt á flugvöllinn og keyrð upp á Tallink Hotel Riga, frjáls dagur eftir það.

Dagur 2 | 12. Júní
Áfangastaðir | Tirana, Albanía | Krujë, Albanía

Dagurinn hefst á flugi frá Riga klukkan 00:15 og lendum við í borginni Tirana klukkan 01:55. Eftir að við höfum sótt farangurinn erum við keyrð á hótelið okkar.

Við byrjum daginn á morgunverði á hótelinu okkar. Áfangastaður okkar þennan daginn er Krujë, fallegur smábær sem situr á hæð. Þessi bær á sér merka sögu og var í aðalhlutverki þegar Albanir stóðu í vegi fyrir að Ottóman-veldið næði að herja á vesturhluta Evrópu. Þjóðhetjan Skanderbeg leiddi Albani í þessum hernaði og var fyrir vikið útnefndur sérstakur verndari Kristinnar trúar af þáverandi páfa. Við munum heimsækja Krujë kastalann og Skanderbeg safnið, eitt frægasta safn landsins, áður en lengra er haldið með stuttri heimsókn til útimarkaðar þar.

Við endum daginn í Tirana þar sem við borðum saman kvöldverð og gistum yfir nótt á Hotel Starlight.

Dagur 3 | 13. Júní

Áfangastaðir | Shkodër, Albanía | Tirana, Albanía

Að loknum morgunverði keyrum við til bæjarins Shkodër, sem á sér rúmlega 2,200 ára langa skráða sögu. Við komum til með að heimsækja Rozafa kastalann og njóta hins stórfenglega útsýnis þar og einnig Marubi National Museum of Photography þar sem við skoðum einstakt safn af ljósmyndum frá daglegu lífi heimamanna frá fyrri hluta 19. aldar til loka hennar. Við förum í gönguferð um hina nýlega endurbyggðu göngugötu bæjarins og virðum fyrir okkur arkitektúr frá Ítalíu og Austurríki sem er vitnisburður um tengsl þeirra landa við Albaníu áður fyrr.

Í lok dags keyrum við aftur til Tirana þar sem við borðum saman kvöldverð og gistum á Hotel Starlight.

Dagur 4 | 14. Júní

Áfangastaðir | Tirana, Albanía

Að loknum morgunverði hefst skoðunarferð okkar um Tirana, okkar fyrsti áfangastaður er Bunk'Art 1 safnið sem var byggt í gömlu kjarnorkubyrgi á jaðri Tirana, hér fáum við einstaka innsýn í sögu Albaníu, kommúnisma og hvernig kommúnismi hefur haft áhrif á sögu og menningu Albaníu.

Eftir heimsókn okkar í neðanjarðarbyrgið höldum við til höfuðstöðva Bektashi reglunnar sem er angi af íslömskum súfisma sem teygði sig upphaflega til Albaníu í gegnum Janissary arm tyrkneska keisaraveldisins, hér munum við fræðast um þessa stefnu, siði þeirra og menningararfs. Við munum verja seinni parti dagsins í að rölta um svæðið sem er sérlega friðsælt, dást að fallegri byggingarlistinni og afslappandi andrúmsloftinu.

Við ljúkum deginum með gönguferð um miðborgina, virðum fyrir okkur litríkar götur og líflega útimarkaði áður en við endum daginn með kvöldverði og gistum aftur á Hotel Starlight.

Dagur 5 | 15. Júní

Áfangastaðir | Ardenica Monastery, Albanía | Apollonia, Albanía | Radhimë [Vlorë], Albanía

Við byrjum daginn á morgunverði á hótelinu okkar áður en við höldum við til bæjarins Vlorë þar sem Albanir lýstu yfir sjálfstæði sínu. Á leiðinni munum við heimsækja Ardenica klaustrið sem var reist á miðöldum. Í kirkjunni er að finna helgimyndir eftir albanska listamenn eins og Athanas Zografi og Kostandin Shpataraku. Þjóðsagan segir að þjóðhetja Albaníu, Gjergj Kastrioti eða Skanderbeg, hafi gift sig í kirkjunni árið 1451.

Okkar næsti áfangastaður er hin forna borg Apollonia sem var upphaflega stofnuð af Grikkjum sem komu frá Corinth í Grikklandi um 600 árum fyrir Krist. Hún var þegar orðin stórborg á tímum Grikkja með um 50 þúsund íbúa og síðar meir undir stjórn Rómarveldis varð hún enn mikilvægari sökum nálægðar hennar við helstu vegi stórveldisins. Rómverski keisarinn Augustus Octavius stundaði nám í borginni um tíma.

Við skoðum fornleifar svæðisins og safnið þar áður en við keyrum til Radhimë sem er einskonar úthverfi Vlorë þar sem við borðum saman kvöldverð og gistum á Hotel Partner.

Dagur 6 | 16. Júní

Áfangastaðir | Vlorë, Albanía

Þennan daginn gefst frjáls tími til að njóta þess sem Vlorë hafa upp á að bjóða. Fallegar strendurnar þar sem tilvalið er að fara í sólbað, kristaltær sjórinn, jafnvel kajaksiglingar fyrir þá sem það vilja.

Við hittumst síðan um kvöldið og borðum saman kvöldverð, við gistum áfram á Hotel Partner.

Dagur 7 | 17. Júní

Áfangastaðir | Llogara Pass, Albanía | Ali Pasha Castle, Albanía | Sarandë, Albanía

Við byrjum daginn á morgunverði á hótelinu okkar og ferðumst síðan meðfram sjónum til borgarinnar Sarandë og á leið okkar þangað ökum við eftir tilkomumikilli fjallaleið í yfir 1,000 metra hæð yfir sjávarmáli. Við munum sjá Llogara skarð á leiðinni og njótum fallegs útsýnis sem blasir við okkur þaðan.

Við munum heimsækja Ali Pasha kastalann sem stendur við höfn Porto Palermo flóans áður en við endum dagskrá dagsins í Sarandë þar sem við borðum saman kvöldverð og gistum á Hotel Saranda International.

Dagur 8 | 18. Júní

Áfangastaðir | Butrint, Albanía | Ksamil Beach, Albanía | Sarandë, Albanía

Við byrjum daginn á morgunverði á hótelinu okkar áður en við förum til hinnar fornu borgar, Butrint, sem er á heimsminjaskrá UNESCO. Þessi dagur verður hálfgert ferðalag til fortíðar og Butrint hápunktur hans. Á tímum forn-Grikkja var borgin grísk nýlenda en yfir aldirnar girntust hana hin ýmsu ríki, þar á meðal Rómverjar eins og rannsóknir fornleifafræðinga á svæðinu hafa leitt í ljós. Borgin var staðsett úti á nesi, umlukin framandi og litríkri náttúru.

Eftir heimsóknina til Butrint keyrum við til Ksamil strandarinnar þar sem við borðum saman hádegisverð og síðan er frjáls tími á ströndinni.

Við endum daginn aftur í Sarandë þar sem við borðum saman kvöldverð og gistum aftur á Hotel Saranda International.

Dagur 9 | 19. Júní

Áfangastaðir | The Blue Eye, Albanía | Gjirokastër, Albanía | Berat, Albanía

Við byrjum daginn á morgunverði á hótelinu okkar. Við setjum stefnuna á bæinn Gjirokastër, fallegur bær sem er á heimsminjaskrá UNESCO og þekkt fyrir sérstakar byggingar. Í raun er bærinn eitt stórt safn af virkilega vel varðveittum, fögrum og sérstökum byggingum í arkitektúr Tyrkjaveldis eða Ottóman-veldisins. Yfir bænum stendur kastalavirki sem við munum heimsækja og þar finnum við vel útbúið vopnasafn, meðal annars vopn frá fyrri heimsstyrjöldinni. Þessi kastali geymir ekki einungis vopnasafnið því fimmta hvert ár er haldið landsmót tileinkað þjóðlagatónlist og dansi. Við borðum saman hádegisverð í Gjirokastër.

Á leið okkar til Gjirokastër munum við heimsækja náttúrufyrirbærið Bláa Augað eða “The Blue Eye”. Þetta vatnsból er þekkt fyrir hið kristaltæra vatn sem kemur upp þar.

Við endum daginn í borginni Berat þar sem við borðum saman kvöldverð og gistum á Home Plaza Hotel.

Dagur 10 | 20. Júní

Áfangastaðir | Berat, Albanía

Við byrjum daginn á morgunverði á hótelinu okkar áður en við förum í skoðunarferð um eina fegurstu borg Albaníu, Berat. Borgin er ein fjölmargra perla sem Ottóman-veldið skildi eftir sig og áhrif Ottóman-veldisins má sjá víða, meðal annars í því hversu margar moskur eru í borginni. Borgin hefur oft verið kölluð "The Town of a Thousand Windows" eða Þúsund-glugga Borgin, kemur nafnið til vegna hinna hvítkölkuðu húsa með glugga sem virðast nánast hafa verið byggðir hver ofan á annan. Hér sjáum við mjög spennandi samsuðu hinna ýmsu menningarheima í einni og sömu borginni.

Við munum einnig heimsækja kastala borgarinnar sem gnæfir yfir henni. Kastalinn er ansi merkilegur fyrir margt en kannski einna helst vegna þess að íbúar þar búa enn í sömu húsum og forfeður þeirra gerðu áður fyrr. Innan virkisveggja kastalans voru margar kirkjur og sjö þeirra standa enn, þar af hefur einni þeirra verið breytt í safn sem hýsir verk eftir listamanninn Onufri sem var uppi á 16. öld. Hann skapaði fjöldan allan af veggmyndum og líkneskja sem má finna í kirkjum víðsvegar bæði í Albaníu og Grikklandi.

Við endum daginn á kvöldverði saman áður en við förum aftur á hótelið okkar í Berat, Home Plaza Hotel.

Dagur 11 | 21. Júní

Áfangastaðir | Pogradec, Albanía | Lake Ohrid, Albanía | Tuhemisht, Albanía

Við byrjum daginn á morgunverði á hótelinu okkar. Þennan daginn höldum við til borganna Pogradec og Elbasan auk vatnsins Ohrid. Einnig munum við skoða okkur um í Driloni þjóðgarðinum. Á ferðalagi okkar þennan daginn sjáum við mörg spennandi og þjóðleg þorp, til dæmis Belshi og Tushemisht þar sem við kynnum okkur líf og umhverfi íbúanna.

Seinni hluti dagsins er frjáls tími við fyrrnefnt stöðuvatn þar sem er tilvalið að eiga notalega og afslappaða stund áður en við endum daginn með kvöldverði saman í Pogradec þar sem við gistum á Hotel Perla.

Dagur 12 | 22. Júní

Áfangastaðir | Lin, Albanía | Durrës, Albanía

Við byrjum daginn á morgunverði á hótelinu okkar áður en við keyrum af stað til þorpsins Lin sem geymir rústir kirkju frá tímum Austrómverska Keisaradæmisins, kirkjan trónir yfir nærliggjandi landsvæði frá hæð. Hér er einnig að finna fornleifauppgröft og virðast minjarnar sem hafa fundist þar benda til þess að hér sé eina elstu byggð Evrópu.

Við gistum í Durrës á Ajsel Hotel.

Dagur 13 | 23. Júní

Áfangastaðir | Divjakë-Karavasta National Park, Albanía | Divjakë, Albanía | Durrës, Albanía

Eftir morgunverð höldum við frá Durrës til Karavasta lónsins sem er staðsett í Divjakë-Karavasta National Park þjóðgarðinum, einum dýrmætasta sinnar tegundar í landinu. Þar munum við ganga um garðinn, sjá fjölbreytt vistkerfi garðsins sem og mikinn fjölda fugla sem kalla hann heimili sitt eins og dalmatíu-pelíkanans. Hér getum við einnig notið tilkomumikils útsýnisins frá útsýnisturni í garðinum.

Eftir hádegið gefst okkur tækifæri til að slaka á við Divjakë ströndina eða þá að fara í gönguferð um skóglendið þar.

Við endum daginn aftur í Durrës þar sem við gistum áfram á Ajsel Hotel.

Dagur 14 | 24. Júní

Áfangastaðir | Durrës, Albanía

Frjáls dagur í Durrës, hér gefst okkur tækifæri til að eiga notalegan dag við ströndina - hvítur sandur, tær sjór og sól býður okkur upp á allt það besta sem Adríahaf hefur upp á að bjóða. Hér er allt miðað að ferðalöngum, allt frá veitingastöðum og kaffihúsum til ýmiskonar afþreyingar.

Við gistum áfram á Ajsel Hotel.

Dagur 15 [16] | 25. - 26. Júní

Áfangastaðir | Durrës, Albanía | Tirana, Albanía | Riga, Lettland

Frjáls dagur í Durrës þar til við höldum af stað á flugvöllinn í Tirana um kvöldið. Flugið okkar þaðan er síðan klukkan 02:35 þann 26. Júní og áætluð lending í Riga, Lettlandi, er klukkan 06:15 á staðartíma. Við komu til Riga er haldið upp á hótel og þar gistum við.

Klukkan 14:00 um daginn er síðan farið í skoðunarferð um Riga sem er um þrjár klukkustundir, að henni lokinni er frjáls tími þar til við höldum út á flugvöll.

Heimflugið okkar er klukkan 23:00 og áætluð lending heima á Íslandi klukkan 23:55.